Դեկտեմբերի 1-ին ավարտվեց  «ՀՀ մարզաբնակ ուսանողների մեդիագրագիտության, թվային գրագիտության և կիբեռգրագիտության կարողությունների զարգացման ծրագիր՝ ԱՊՀ երիտասարդների հետ համագործակցությամբ» յոթամսյա միջազգային ծրագիրը, որը ՀՀ ԿԳՄՍ նախարարության աջակցությամբ իրականացրեց «ԿԱՄՔ» Լոռվա երիտասարդական ծրագրերի կենտրոն» հասարակական կազմակերպությունը: Ծրագրի ընդհանուր շահառու են եղել  ՀՀ սահմանամերձ մարզերից  և ԱՊՀ երկրներից հայ և այլազգի շուրջ 350 երիտասարդ (առաջնային և երկրորդային միասին):

Ծրագրի առաջին փուլում ՀՀ մարզերից (Սյունիք, Վայոց Ձոր, Գեղարքունիք, Տավուշ, Շիրակ, Լոռի) 16-30 տարեկան շուրջ 120 և ԱՊՀ երկրներից  շուրջ 40 երիտասարդ մասնակցել են մեդիագրագիտության, թվային գրագիտության և կիբեռգրագիտության վերաբերյալ առցանց դասընթացների,  հաղորդակից դարձել համացանցից ճիշտ օգտվելու կանոններին, սովորել քննադատաբար վերլուծել մեդիա հաղորդագրությունները, ստուգել փաստերն ու չտարածել կեղծ լուրեր, չդառնալ տարատեսակ կիբեռհանցագործությունների ու թվային միջավայրին բնորոշ խարդավանքների զոհ:  Առցանց դասընթացներից հետո ծրագրի շահառու երիտասարդներն ուսումնասիրել են իրենց տարածաշրջաններում թվային միջավայրում առավել հաճախ հանդիպող կիբեռհանցագործությունների ու մեդիամանիպուլյացիաների դեպքերը և պատրաստել զեկույց-հոդվածներ:

Լավագույն  զեկույցները ներկայացվել են «ԱՊՀ երկրներում տարածված մեդիամանիպուլյացիաներն ու կիբեռհացնագործությունները երիտասարդների դիտարկմամբ»  առկա-առցանց ձևաչափով կազմակերպված միջազգային երիտասարդական մեդիա կոնֆերանսին, որի շրջանակում ՀՀ սահմանամերձ մարզերից և ԱՊՀ երկրներից մասնակից երիտասարդները բարձրաձայնել են իրենց կամ իրենց հարազատների, հասակակիցների ու ընկերների հետ պատահած կիբեռհանցագործությունների ու մեդիամանիպուլյացիաների տարբեր դեպքեր, քննարկել դրանցից պաշտպանվելու հնարավոր տարբերակները, հանդես եկել առաջարկներով ու խորհուրդներով՝ ձգտելով նպաստել կիբեռհանցագործությունների զոհերի թվի կրճատմանը ՀՀ մարզերում, ինչպես նաև ԱՊՀ անդամ պետություններում: Կոնֆերանսին ներկայացված հոդվածները տեղ են գտել ծրագրի շրջանակում ստեղծված առցանց հարթակում և տեղեկատվական տեսաֆիլմում:

-Կոնֆերանսին ներկայացված հոդվածների ուսումնասիրությունից պարզ է դառնում, որ ԱՊՀ տարբեր երկրներում ամենից տարածված կիբեռհացնագործություններն ու մեդիամանիպուլյացիաները ֆինանսական բնույթի են, կային նաև կրկնվող, իրար նման պատմություններ, ինչը վկայում այն մասին, որ ԱՊՀ երկրներում և ՀՀ սահամանամերձ մարզերում թվային միջավայրում հաճախ են պատահում բնույթով իրար շատ մոտ կամ միանման կիբեռհանցագործություններ ու մեդիամանիպուլյացիաների դեպքեր, ուստի ճիշտ է ասված, որ կիբեռհանցագործությունը սահմաններ չունի,- նշում է ծրագիրն իրականացնող «ԿԱՄՔ» ՀԿ-ի նախագահ Նազելի Ավագյանն ու հավելում.- Այս առումով, կարևոր է դառնում տարբեր երկրների՝ ինչպես իրավապահ մարմինների, այնպես էլ հասարակությունների միջև ակտիվ համագործակցությունը, քանզի լսելով մեկս մյուսի պատմությունները՝ դառնում ենք ավելի իրազեկ և հետևաբար ավելի պաշտպանված թվային միջավայրում հանդիպող տարբեր խարդախություններից:

Ծրագրի երկրորդ փուլում Լոռու մարզի Ստեփանավան քաղաքում անց է կացվել «Մեդիագրագետ ուսանող»  եռօրյա ամառային ճամբար, որին ներգրավվել և մեդիագրագիտության ուղղությամբ կարողությունները զարգացրել են  ՀՀ սահմանամերձ մարզերից ծրագրի առաջին փուլը հաջողությամբ ավարտած  լավագույն 30 երիտասարդները: Ճամբարի ընթացքում նրանք խորացրել են առցանց ստացած գիտելիքներն ու հմտությունները մեդիագրագիտության, թվային գրագիտության և կիբեռգրագիտության ուղղությամբ, ինչպես նաև ձեռք բերել վերոնշյալ թեմաներով ոչ ֆորմալ կրթական դասընթացներ, տեղեկատվական արշավներ վարելու հմտություններ՝ վերապատրաստվելով որպես մեդիագրագիտության մարզային առաջնորդներ: Ճամբարի ավարտին տեղի  է ունեցել «Մեդիամարտ» ինտելեկտուալ միջմարզային խաղ-մրցույթ՝ բռեյն-ռինգ, որի ընթացքում ճամբարական երիտասարդներն, ըստ  մարզերի կամզավորելով թիմեր, մրցել են միմյանց հետ՝ ամփոփելով-ամրապնդնելով ծրագրի շրջանակում ստացած գիտելիքները: Լարված ու թեժ պայքարում «Մեդիամարտում» հաղթել է Լոռին ներկայացնող թիմը:

Եռօրյա ճամբարը հագեցած էր նաև Ստեփանավանի պատմամշակութային եւ տեսարաժան վայրեր այցելություններով, Լոռվա մարագարիտ համարվող Ստեփանավանի բնության  գողտրիկ անկյունները բացահայտելով, իսկ երեկոները՝ խարույկի շուրջ զրույցներով, երգ ու պարով, ինչն էլ նպաստեց Հայաստանի տարբեր մարզերի երիտասարդների միջև ընկերության հաստատմանն ու ակտիվ համագործակցությանը,  երիտասարդների հետաքրքիր և բովանդակալից ժամանցի կազմակերպմանը:

Ծրագրի երրորդ փուլում ճամբարական երիտասարդները, որպես  մեդիագրագիտության մարզային առաջնորդներ, վերադառնալով սահմանամերձ  մարզեր, իրենց կրթօջախներում անց են կացրել մեդիագրագիտության տեղեկատվական արշավներ, սեմինար-հանդիպումներ՝ ստացած գիտելիքները տարածելով ծրագրի շահառու սահմանամերձ մարզերի երիտասարդների շրջանում: Ծրագրի այս փուլին ներգրավել է շուրջ 200   երիտասարդ՝ հիմնականում ծրագրի շահառու մարզերի բուհերի, քոլեջների ուսանողներ, ինչպես նաև դպրոցների բարձր դասարանների աշակերտներ, որոնք էլ մեդիագրագիտության և կիբեռգրագիտության վերաբերյալ ստացած գիտելիքներին հաղորդակից կդարձնեն իրենց ընտանիքների անդամներին, ընկեր-բարեկամներին՝ այդ կերպ նպաստելով ծրագրի թիրախ մարզերի բնակչության շրջանում մեդիագրագիտության, թվային գրագիտության և կիբեռգրագիտության մակարդակի բարձրացմանը, ինչն էլ իր հերթին կնվազեցնի կիբեռհանցագործությունների ենթարկման մակարդակը ՀՀ սահմանամերձ մարզերում: