Քիք-բոքսինգի «Սյունիք» մարզական ակումբը՝ շարունակելով բարի ավանդույթները Հայաստանի Հանրապետության հավաքականի կազմում նոր հաջողություններ է արձանագրում միջազգային բոլոր մրցաշարերում: Եվրոպայի եւ աշխարհի առաջնություններից մեր ակումբի սաները, ինչպես միշտ, տուն են վերադառնում սպորտային մեծ ռազմավարով: Ակումբը գրում է իր ոսկե տարեգրությունը եւ չէին լինի այդ ձեռքբերումները, եթե մարզչական շտաբը, ակումբի ղեկավարությունը եւ պատանի մարզիկները չստանային ԶՊՄԿ ՓԲԸ գլխավոր տնօրեն Ռոման Նիկոլայի Խուդոլիի եւ կայուն զարգացման տնօրեն Արմեն Ստեփանյանի նվիրական աջակցությունը։

Ակումբի հաջողությունների մեջ իրենց ուրոույն տեղն ունեն ՀՀ վաստակավոր մարզիչ Արա Սարգսյանը եւ քիք-բոքսինգի ազգային ֆեդերացիայի փոխնախագահ, մարզիչ Վիկտոր Խաչատրյանը, ովքեր տքնաջան եւ անբասիր աշխատանքի համար քիք-բոքսինգի ֆեդերացիայի նախագահի կողմից արժանացել էին «Ֆեդերացիայի վաստակավոր մարզիչ» կոչմանը, ինչը խթանեց էլ ավելի մեծ նվաճումների տանել ակումբի սաներին։ ՀՀ քիք-բոքսինգի ֆեդերացիայի նախագահ Գառնիկ Հայրապետյանի առանձնահատուկ մոտեցումը մեր ակումբի նկատմամբ ինքնին հասկանալի է․․․ Իր խոսքում մշտապես շեշտադրում է հետեւյալը՝ Սյունիքը Հայաստանի հարավային դարպասն է եւ ողնաշարը, իսկ ակումբի տղաները մշտապես պահպանում են լավ մարզավիճակը եւ մրցումներին ներկայանում մարտական կեցվածքով։ Ի դեպ, ընթացիկ տարում լրանում է Արա Սարգսյանի սպորտային եւ մարզչական գործունեության 25-ամյա հոբելյանը, մարդ, ով իր փայլուն կենսագրությամբ քառորդ դար է ինչ աշխարհի սպորտային քարտեզի վրա ոսկե տառերով ամրագրել է Սյունիք եւ Կապան ոսկեղենիկ անունները:

Հայաստանի քիք-բոքսինգի ազգային ֆեդերացիան հրավեր էր ստացել ապահովելու Հայաստանի հավաքականի մասնակցությունը Աշխարհի գավաթի խաղարկությանը, որը կայացավ ս/թ․ հունիսի 12-ից մինչեւ հունիսի 15-ը Հունգարիայի մայրաքաղաք Բուդապեշտում: Հերթական անգամ մեր սաները փայլուն ցուցանիշներ գրանցեցին եվրոպական ռինգում եւ 9 մարզիկներ արժանացել էին ոսկե, արծաթե եւ բրոնզե մեդալների, թեեւ ըստ մարզիչ Արա Սարգսյանի դա լավագույն արդյունքը չէր, մենք կարող էինք ավելի լուրջ հաջողությունների հասնել, եթե չլինեին անսպասելի վնասվածքները եւ խանգարող այլ հանգամանքներ, իր խոսքում ասաց մարզիչը։

Քիք բոքսինգի «Սյունիք» մարզական ակումբի համար օրը լի էր անակնկալներով:

Մարզումների ամենաթեժ պահին ակումբի սաների հետ հանդիպման այցելուներն էին ակումբի բարեկամներ, գործարար աշխարհում հայտնի եղբայրներ Էդգար եւ Յանեկ Հակոբյանները, ովքեր ջերմորեն շնորհավորեցին ակումբի սաներին՝ հայտնելով իրենց եւ մեր ժողովրդի երախտագիտությունը՝ միջազգային բարձր ստուգատեսներում հայոց ԵՌԱԳՈՒՅՆԸ արժանիորեն վեր բարձարացնելու համար: Եղբայրները ժամանակին եղել են այս ակումբի հիմնադիր սաներից, Արա Սարգսյանի թիմի կազմում մասնակցել են Հայաստանի առաջնություններին եւ կանգնել պատվո պատվանդանի 1-ին աստիճանին։

Ակումբի մարզիչներ Արա Սարգսյանի, Վիկտոր Խաչատրյանի, ծնողական համակազմի, երկրպագուների, ակումբի սաների եւ իմ անունից շնորհակալություն ենք հայտնում Էդգար եւ Յանեկ եղբայրներին, ովքեր իրենց ծանրակշիռ դերակատարումն են ունեցել ակումբի կայացման դժվարին գործում, մշտապես եղել թիմի կողքին՝ ֆինանսական պատկառելի պարգեւավճարներ տրամադրելով մեդալների արժանացած մեր սաներին:

Այս մասին Marzer.am-ը տեղեկացավ ակումբի փոխնախագահ Արսենի Գրիգորյանի ֆեյսբուքյան էջից։